By May 11, 2018 0 Comments Report

ஜோதிடத்தில் மருத்துவம் – சந்திரனால் வரக்கூடிய நோய்கள்..!!

ராசி மற்றும் நட்சத்திரங்களால் ஏற்படும் பாதிப்புகளைப் போல, நவக்கிரகங்களாலும் பாதிப்புகளும், நோய்களும் ஏற்படக்கூடும். அந்த வகையில் இன்று சந்திர பகவானால் வரக்கூடிய நோய்களை பற்றிப் பார்க்கலாம்.

நமது உடலில் நோயை தோற்றுவிப்பதில் முக்கிய பங்கு சந்திரனுக்கு உண்டு. மனித உடலில் நோயை அதிகப்படுத்துவது, குறைப்பது, நோயைப் போக்குவது என எல்லாப் பணிக்கும் சந்திரனே காரணகர்த்தா ஆவார். ஒழுங்கற்ற உடலமைப்புக்கும் இவரே காரணமாக உள்ளார். மூக்கில் நீர்த்த சளி ஒழுக வைப்பது, உடலில் கெட்ட நீரை உண்டாக்குவது, வயிற்றுக்குள் உண்டாக்கும் புண்கள் போன்றவற்றுக்கும் சந்திரனே காரணம்.

பெண்களைப் போல் செய்கை செய்வது, உடலில் எவ்வித அசைவும் இன்றி கிடப்பது, உண்ணும் நீரில் நோயைக் கொடுப்பது, சுறுசுறுப்பின்றி மந்தமாக செயல் படுவது, தொழுநோய்கள் உண்டாவது, பிறப்பு உறுப்பை சுற்றியும், அக்குளில் உண்டாகும் சொறி, சிரங்கு, விஷக்கடி களால் ஏற்படும் புண், அறு வறுப்பான உடல் மற்றும் தோல், எச்சில் நீர் மூலம் பரவக்கூடிய நோய்கள், போதை வஸ்து, காதல் மயக்கம் மற்றும் மனநிலை பாதிப்பால் உடலைச் சேதப்படுத்திக்கொள்வது, சிறிய அம்மை நோய், மனிதன் இறந்த பின்பு அந்த உடல் அடையும் நிகழ்வுகள் அனைத்துக்கும் சந்திரனே காரணமாக இருக்கிறார்.

* சந்திரன் எந்த ராசியிலும் பகை நிலை பெறுவது இல்லை. ஆனால் விருச்சிக ராசியில் நீச்சத் தன்மை பெறுகிறது. சந்திரன் நீச்சம் என்னும் நிலையில் இருந்தால், விருச்சிக ராசிக்குரிய அனைத்து நோய்களும் உண்டாகும். அந்த நபர் வித்தியாசமான மனப்போக்கு கொண்டவராக இருப்பார். அந்த நபரின் தாய்க்கு தீர்க்க முடியாத பிரச்சினை வரக்கூடும். பரிதாபத்துக்குரிய நபராக இருப்பார்.

* சந்திரன் பகை கிரகங்களான ராகு-கேதுவுடன் இணைந்து இருந்தால், அந்த நபர் மெலிந்த உடல்வாகு பெற்றிருப்பார். எந்த நேரமும், ஏதேனும் ஒரு உடல் வலி இருந்து கொண்டே இருக்கும். இவரது தாய்க்கு தீராத நோய் இருக்கும் அல்லது தாய் இல்லாமல் இருப்பார்.

* சந்திரன் பகை கிரகமான ராகு-கேதுவின் நட்சத்திர பாதத்தில் நின்று இருந்தால், அந்த நபருக்கு விஷ வாயு தாக்கக் கூடும். உண்ணும் உணவும் நீரும் விஷத்தன்மை அடையலாம். தோல் அரிப்பு நோய் வரலாம். இவரது தாய் பாசற்று, சுயநலம் பிடித்தவராக இருக்கக்கூடும்.

* சந்திரன் லக்னத்திற்கு 6,8,12-ம் இடங்களில் (பாவத்தில்) நின்று இருந்தால், அந்த நபருக்கு மன தைரியம் குறையும். உடல் நோய்கள் பற்றிய அலட்சியப் போக்கு இருக்கும். இவரது தாய்க்கு அதிர்ஷ்டம் என்பதே இல்லாமல் இருக்கும்.

* சந்திரன் 6, 8, 12-ம் இடத்திற்கான பாவத்திற்குரிய அதி பதிகளுடன் இணைந்திருந்தால், அந்த நபர் உடல் ரீதியாக ஏதாவது ஒரு தொல்லையை அனுபவித்துக் கொண்டே இருக்க நேரிடும். மருத்துவம் பார்க்கக்கூட உரிய நேரம் இல்லாமல் அலைந்து திரிந்து, நோய் வலுவடையக்கூடும். இவரது தாய்க்கு மனக்கஷ்டம் தீராது. உடல் கஷ்டம் இருந்து கொண்டே இருக்கும். தாய் ஸ்தானத்தில் வேறு ஒருவர் இருப்பார்.

* சந்திரன் லக்னத்திற்கு பாதகாதிபதியுடன் சேர்ந்து இருந்தாலோ அல்லது பாதகாதிபதியின் நட்சத்திர பாதகத்தில் நின்று இருந்தாலோ அந்த நபருக்கு நீரில் உண்டாகும் அனைத்து நோய்களும் வரக்கூடும். பருவ கால காய்ச்சல், தொற்று நோய்கள் ஏற்படும். நோய் எதிர்ப்பு சக்தி குறைவாக இருக்கும். இவர்களது தாய் சுயநலமாக இருப்பார். அவரால் கவலைகளே மிஞ்சும்.

* சந்திரனே லக்னத்திற்கு பாதகாதிபதியாக… பாவியாக வந்தால், பெண்களுக்கு வரக்கூடிய நோய்கள் ஆண்களுக்கும், ஆண்களுக்கு வரக்கூடிய நோய்கள் பெண்களுக்கும் வரும். மன அழுத்தம் இருக்கும். இவர்களது தாயால் ஜாதகருக்கு எவ்விதமான பயனும் இருக்காது.

* சந்திரனின் மீது பகை கிரகங்கள் மற்றும் பாதகாதிபதி கிரகங்களின் பார்வை இருந்தால், அந்த நபருக்கு ஒரு நிலையான மனப்போக்கு இருக்காது. அடிக்கடி மனதில் எழும் சந்தேகங்களே இவருக்கு பெரிய நோயாக மாறிவிடும். இவர்களும் குழம்பி, மற்றவர்களையும் குழப்பி விடுவார்கள். சைகோ போன்ற மனநோயாளியாக இருப்பார்கள். இவர்களின் தாய் நோய்களுக்குள் தள்ளப்படுவார்.

* சந்திரன் அஷ்டவர்க்கத்தில் 4 பரல்களுக்கு கீழ் இருந்தால், சந்திரனால் உண்டாகும் நோய்களில் சிக்கி தவிப்பார்கள். தாய் நிலை கூட சொல்லும்படியாக இருக்காது.

பொதுவான பலன்

சந்திர கிரகமானது, ராகு-கேது, சூரியன், சனி, சுக்ரன் ஆகியவற்றோடு சேர்ந்து, எந்த ராசியில் இருந்தாலும் இவ்வுலகில் பொதுமக்கள் அச்சத்துடன் வாழ வேண்டிய நிலை வரும். நாடு களுக்கு இடையே போர் உருவாகலாம். கடலில் சுனாமி, புயல் போன்ற இயற்கைச் சீற்றங்கள் ஏற்பட்டு, பொதுமக்களின் இறப்பு எண்ணிக்கை அதிகரிக்கலாம். பெண்களுக்கு உரிய பாதுகாப்பு இல்லாமல் போய்விடும். மழை இன்றி தண்ணீர் தேவைக்காக பல இடங்களுக்கு அலைய வேண்டி வரும். பொதுமக்கள் விரும்பாத சம்பவங்கள் நடைபெறும். மருந்து கண்டுபிடிக்க முடியாத நோய்கள் வந்து மக்களை வாட்டி எடுக்கும்.

சந்திரன் தரும் நன்மைகள்

சந்திரன் ஒருவரது ஜாதகத்தில் வலுவாக இருந்தால் ஒரு சில நன்மைகள் ஏற்படும். சந்திரனின் யோகமானது ஒருவரை, பொதுமக்களால் விரும்பப்படும் மனிதராக மாற்றிவிடும். மேலும் நோய்களின் வீரியமும், வலிகளும் குறையும். மனிதர்களின் மனம் அணிந்து நடக்கும் தலைவராக அந்த நபரை உருவாக்கும். சந்திரன் வலுவடைந்த நபர், தன்னுடைய திறமைகளை வெளிக்காட்டி பாராட்டு பெறுவார்.

எப்போதும் பொலிவோடு இருக்கும் முகத்தைப் பெறுவார். தாய் வழியில் சொத்துகள் வந்து சேரும். எந்த நேரமும் சுறுசுறுப்பாக இருக்க வைக்கும். சந்திரன் உச்சம் பெற்றவர்கள், தங்களின் உடலையும், உள்ளத்தையும், தாங்கள் உண்ணும் உணவையும் சுத்தமாக வைத்துக்கொள்ள நினைப்பார்கள். தாய்குலத்திற்கும், பெண்களுக்கும் நன்மை செய்பவர்களாக இருப்பார்கள். கடல் கடந்து பொருள் திரட்டும் ஆற்றல் பெறுவார்கள். கடலில் முத்து எடுப்பவராகவும், முத்து வியாபாரம் செய்பவராகவும் இருப்பார்கள். பட்டப்பெயர், செல்லப்பெயர், அரசு தரும் பட்டம், அடைமொழி இவையாவற்றுக்கும் சந்திரனே காரணமாவார்.


Post a Comment